იდინეთ, დღენო!
იდინეთ დღენო, მიმაგებეთ ამოსვლას მზისას,
მოჰფინე, მზეო, საოცარი სხივები მიწას,
შენს გულში თბება ჩემი სული, ჩემი სხეული
და მიყუჩდება ტკივილები გარდარეული.
ჰე, ქერუბიმნო, სასწაული აჩვენეთ თვალთა,
მიწიდან ჩქეფდეს შადრევნები სნეულთ მკურნალთა
და გაირინდოს დედამიწა ცასთან ალერსში,
არსად ისმოდეს მოტირალთა კვნესა ღამეში.
სულის საწყაო გადამივსეთ ღრმა სიყვარულით,
გამიქრეს ზიზღი, სიძულვილი მტრისა ფარული,
გადააპენტეთ მთის მწვერვალებს ქათქათა თოვლი,
მოჰფინეთ ზეცას ვარსკვლავების ულევი ხომლი,
რომ გადანათდეს დედამიწა უცხო ნათებით,
ქვეყნად სიკეთეს აღარ ჰქონდეს არსად საზღვრები,
და მოგვიბოძეთ წმინდა გული დედამიწელებს,
რომ სადარბაზოდ წმინდანთ კრება ზეცად გვიწვევდეს.
No comments:
Post a Comment