ნეტავ მდინარე ვიყო,
ოფლითა ვრწყავდე ხეებს,
არ მასვენებდეს დარდი,
ცრემლით ვალბობდე ველებს,
მკურნალად ვექცე ყველას,
კაცსაც ვარგო და ტყესაც,
ნუღარ მომასწროს ღმერთმა
სისხლის ღვრასა და დელგმას.
მშვიდობის ვმღერდე "ნანას",
ტალღებს მიჰქონდეს ქვიშა,
რომ აშენებდნენ სახლებს,
მოხატულსა და მბრწყინავს.
მინდა სიკეთეს ვთესდე,
გვერდს მიმშვენებდეს ბაღი,
დაისვენებდეს ბალღი,
იყოს მშვიდი და ლაღი.
მდინარე მინდა ვიყო,
კლდიდან მოვქუხდე თავქვე,
ქვებს ასხლეტილი შხეფი
ცაში აწვდიდეს ნათელს.
No comments:
Post a Comment