ქალბატონი წვიმა ავტ. მიშიკო ხალიჩაშვილი

 ქალბატონი წვიმა

გამეღვიძა... ფანჯარაზე ხმაა ტოტის,

რა ხანია, დღეებს ვითვლი ღრუბლიანებს,

დილის გზაზე ქალბატონი წვიმა მოდის,

ლამაზ ტანზე ქარის კაბა უფრიალებს.

სველ ხელებში იის კონა უკავია,

ფიქრი სევდის ფუტუროდან დამასია,

გაშლილ მხრებზე წამოუსხამს გაზაფხული

და იმ ბერძენ თემიდაზეც ლამაზია.

მაღალ ყელზე ვარსკვლავები მოუსხია,

მანონ ლესკოს ვნება უგავს ოკეანეს ...

მოვა მერე მომიწვება თბილ ლოგინზე

და ჩემს სახლში სევდას მოიმშობიარებს..

წკაპ,წკუპ, წკაპ,წკუპ, მოწკაპუნებს წვიმა,

წკაპ, წკუპ, წკაპ, წკუპ, ო, რა ლამაზია!

უკვე მღვიძავს... ფანჯარაზე ხმაა ტოტის,

რა ხანია, დღეებს ვითვლი ღრუბლიანებს,

დილის გზაზე ქალბატონი წვიმა მოდის,

ლამაზ ტანზე ქარის კაბა უფრიალებს...

სიმღერა

 სიყვარულის ფერებში

დამებინდა თვალები, 

ვეღარც შენ დაგინახე, 

ვეღარც კარგი დარები

და გაგიშვი ჩიტივით,

შენც სულ სხვაგან გაფრინდი,

დავრჩი მარტო უსულო,

ღია დამრჩა კარები.

იქნებ, შემოიხედო,

კვლავ დამინთო ალები.

სიყვარულის ფერებში

ამერია გზა-კვალი

და შენც არ მომიცადე,

გამიფრინდი ფრთამალი,

იქნებ ახლა შენც მეძებ,

გიწვევ შენი ამალით.

ფრთამოტეხილს რომ მნახავ,

ალბათ, შეგებრალები.

ერთსტროფიანი (თენგიზ მირზაშვილის ნახატს)

 ეჰ, ქალები, რა ქალები,

უდაბნო და ტრამალები,

ზღვისპირები, ხევხუვები,

ჩვენგან გადანამალები,

ნეტავ, იმათ, ვინც თქვენ გიმზერთ,

გაფიცხებით, გამალებით.

ერთსტროფიანი

 მხრებზე იმედის  და ოცნების ფრთებით დავდივარ,

ეშმაკს,იუდას, ავთა სულებს , ვიცი, არ სძინავთ,

მაგრამ ძალა მაქვს, დედამიწას ზევით ავიტან.

ამეშალა ფიქრები

ამეშალა ფიქრები,

სულ შენთან ვერ ვიქნები,

ბევრი რომ არ დალიო,

აგიშენებ სტადიონს,

ითამაშე ფეხბურთი,

მე - ღვინო და შენ - ლუდი.

სხვა ქალებს კი ასცდები,

მე ვერ დამემალები.

ქრის ქრიზანთემების ლურჯი ზღვა

ქრის ქრიზანთემების ლურჯი ზღვა

მე ქრიზანთემების მორევში დაგეძებ, 

დაგეძებ, დაგეძებ,

შენ კი კვლავ სხვას ეძებ, სხვას ეძებ, სხვას ეძებ 

და ჩემი არ გესმის,

გავატან ამ ჩემს გულს, ამ ფიქრებს, ამ ღამეს  

თაველებს, თაველებს,

წუთიდან წუთამდე, წუთიდან წუთამდე 

ლოდინი მაბერებს.

არ მიყვარს, არ მიყვარს, არ მიყვარს, ვიძახი 

ღამიდან დილამდე,

მიყვარხარ, მიყვარხარ, მიყვარხარ მაინც თრთის 

სიმები გიტარის,

და ისევ დაგეძებ, დაგეძებ, დაგეძებ, დაგეძებ, 

სადა ხარ, მითხარი, 

ქრის ქრიზანთემების ლილის ზღვა, ლილის ზღვა, 

შენსავით ცისდარი.

ნამდვილ სიყვარულს არ ჰყავს მონები! (სიმღერა) შეასრულა მაია სიჭინავამ

შენ მეკითხები და მე გპასუხობ,

რომ სიყვარული ჯვარცმის ტოლია,

კიბეს აივლი უსაფეხუროს,

ქარში, წვიმაში იწყებ ბორიალს.

შენ მეკითხები და მე გპასუხობ,

რომ სიყვარული, ტკბილი ნექტარი,

რომ იყოს თუნდაც სულ უპასუხო,

მაინც გიყვარს და მაინც შეჰხარი.

აშნებულა ოქროს კოშკებიც,

ბევრიც უძღვნიათ ვარდის კონები,

შენ მეკითხები და მე გპასუხობ,

ნამდვილ სიყვარულს არ ჰყავს მონები.