არ დასრულდება ნეტავი?!
იმდენი ტკივილი მოდის,
მაცივ-მაცხელებს ძარღვებში,
ან რა გაუძლებს მოლოდინს,
ამ ქარიშხლიან ღამეში.
ქარი დარაბებს აწყდება,
სნებიანივით ხარხარებს,
ფიჭვების კვნესა არ წყდება,
ქაჯ-მაჯლაჯუნებს ახარებს.
გულში ტკივილად ჩამდგარა
მიმოლეწილი ტოტები,
მეხმიანები ამგვარად,
გულსევდიანი ნოტებით.
არ დასრულდება ნეტავი,
გარეთ ქარიშხლის ღრიალი?!
იქნებ მეღირსოს ნეტარი
გრძნობების ორომტრიალიც.
მაია დიაკონიძე
28.01.2026 წელი
No comments:
Post a Comment